التطير

التطيير هي عادة عند العرب المقصود فيها هي ان يعتقد الانسان ويتفأل او يتشأم بشيئ وهذيالعاده او الصفه نشوفها عند ناس يمكن تحدد حياتهم انا مثلا اعرف ناس وايدين يعتقدون بالحظ ويقروون الابراج, اكو ناس اذا شفتهم من الصبح يومك ينعفس واكو العكس,انا هم مثلاالصبح وبالخط السريع احاول ارسم خط سيري وانيشن على سياره بالخط الي يمي مثلا مرسيدس خضرا او تويوتا عنابي واشوف على الخط يمشي ولا لا اذا انا سبقتها وايد اليوم اموري طيبه واذا السياره سبقتني وساعات ماشوفها اعرف ان اليوم اكو امور وايد ماراح تمشي ,اكو ناس تتفأل باول اغنيه يسمعها, واحد من الربع يقول كنت موصل زوجتي مستشفى الولاده ودخلتها عشان الصبح يولدونها وهذيك اليله مانام ويقول شغلت الراديو واول اغنيه وداعيه ياخر ليله تجمعنا حق عبدالكريم يقول واطيح له بجي تدرون شصار له بنته الحين عمرها عشر سنين,احلى شي انا اكو واحد معوق معا بالدوام معاه شلل اطفال بس انسان مكافح يداوم ومتزوج وسكبه طوع الاعاقه , كل ما اشوفه خاصه الصبح يومي يصير شحلوه وهات ياضحك وغشمرة تدرون ليش ؟ لاني عقب ماطيحت الميانه معاه طلبته طلب! يكسر عظام مسوؤلنه بالعصي الي عنده وكل ماصبح علي قلت له ماحان وقت الصفر

حوسة المفتاح

اليوم الاربعاء والوقت منتصف النهار, وانا بالدوام متردد اطلب القهوه, اكتب اغني اسمع , وايد اشياء " حوسه" وايد حوسه ,وفي زحمة هالحوسه , فجأه اتذكر اني نسيت مفتاح السياره بداخلها وقفلت عليه , ويه هذا الي ناقص , مو وقتها المهم كملت شغلي وطلبت القهوه وسمعت الاغاني وبعدين دقيت على المخلص واحد من الشباب وقتله بزرق البيت بيييب المفتاح, وانا بالطريج معاه فتح الريال دردوره وقام يشكي عن العمل وعن مشاكل الزواج وبانورما من الشكاوي, وانا احاتي وين حطيت مفتاح السبير يعني الاضافي, واهز براسي له يعني مشاركه همه, واهو لو يسبني مادري شقوول مشتط, وصلنا البيت ادور وادور عيزت, ماخليت مكان مادورت المهم مالقيت السبير, رجعت مع المخلص ومثل مايقولون الخبل ماينسى سالفته رد يكمل سالفته وانااحاتي شلون بخلي السياره في المواقف طول اليوم, المهم انا اذكر ان الوالد القائد طلب مني اسبير اول ماشريت السياره كعادته , ففكرت بطلب هالسبير رغم ماسيكلفني هذا الطلب من تحلطم وشكوى من برودي وشلوون ضاع وانتم جيل مو مال مسؤوليه وتابعه وقفه من التحلطم, المهم عقب ماوصلت وتحلطم الوالد القائد اكتشفت ان المفتاح بمخباتي وان كل هالحوسه سببها اني تشابهت علي الاحداث فعتقدت اني نسيت المفتاح, والله انا مونساي بس الحوسه حاستني هذا كل ماحدث