من زمان انا ادش

هاي جميع من دخل هلووووووووووووه ماكو صوت ماكو صدى خامووووووووووش

ثنائيات

صار لي جم يوم مسيطره علي فكره غريبه, وحبيت اكتبها عشان ارتاح يمكن ساعات الفكره تتعب المخ وهي فكره اخذتها واحنا قاعدين على غبقه والاكل اشكال والوان .. شي يخلي الواحد يقوول الله يعز الكويت والله يحفظ نعمنا من الزوال .. بس شنهي الفكره .. الفكره ببساطه ان احد اسباب شعورنا ان الدنيا تغيرت وبساطة اوول تحولت ان احنا كنا نعيش ثنائيات شلون ؟ فسر ياشيخ اكثر؟ الليل والنهار, مثال ثنائيه الملح والسكر !التعب والراحه وهكذا بدون هذي الثنائيات مانعرف قيمة الاخر .. ماشي في الزمانات اذكر مثلا بالفن اكو محمود المليجي ويقابله فريد شوقي بالبوكسات, بالرياضه كلاي وفريزر, ام كلثوم واسمهان وبالكويت فتحي كميل وجاسم يعقوب وبالفن عبدالحسين وسعد الفرج وسعاد عبدالله وحياة الفهد ولو بعدد ماخلص اوول بالسعوديه طلال مداح ولا محمد عبده وهذا حال الزمان حتى وقت قريب كان كل شي فيه ثنائيات وكان العالم كله يحكمه ثنائية روسيا وامريكا وبعدين وبعد 1990- وبركات صدام حسين ماعاد غير امريكاالواحد الاحد وصرنا بزمن العولمه والخصخصه وحارة كل من ايدو ايلووو, وماقمنا نشووف الثنائيات بكل شي يمكن الاستثناء اهما السعدوون والخرافي ومايندرع عقبهم شلوون الامور بتصير .. وانا قوول ان الثنائيات مو غلط اهي تسووي توازن وتنافس وتشغل الناس والله يرحم ايام زمان الي كانت الناس منقسمه مابين القادسيه والعربي والشيخ النوري وعلي الجسار وانا الحين مقسووم بثنائيه عجيبه امي صغيره وابوي عوود , اهي بدويه وهو بحري, اهي حلوه وهو اجلح اهي متعلمه على قدها واهو تعليمه زين والدنيا حاكته , اهي محافظه واهو متفتح وكل هالثنائيه وان بينهم اخذ شي زين وشي شين افهم البدوي والحضري اعرف شعور المحافظ والليبرل اعذر الغني واحن على الفقير الثنائيات عجيبه ممكن ترفعك للسما وومكن عقدها تقطك قاع واختمها بقصة صديق لي امه عراقيه وابوه اصلي اخذ من امه العرقنه والنذالة واخذ من ابوه البخل والنحاسه بس هذا مو خوووش ثنائي خاصه عقب الغزو واعرف صديق لي امه مصريه وابوه اصلي اخذ شطانة وفهلوة وسرعة بديهه تفيده وكرم ومرجلة اباه وهو اليوم من خيرة الشباب بس يحتر مني لاني بطن وظهر وعلى شارعين كوتيينوحيوا معي الثنائيات

صيف وغيوم

صيف ساخن وترتفع فيه الحراره مع ملاحظه غير جيده وهي ان الطوز الي نسيناه بالثمانينات وكان عنوانا للصيف رجع هذه السنة بقوه وسبحانه ربي وكأن التاريخ يعيد نفسه مع تهديدات بقطع الكهرباء وهي حقب نسيت في كويت الحاضر اذكر سنين القطع المبرمج لما اليل تنقطع الكهربا كنا نرووح البحر قبال قصر السلام ومعانا جدور الزبيدي والرقي وميوة الصيف مشمش وخوخ واكادنيا ونلعب ونلعب لين نسمع النداء الى البيت وهناك يبدا مشوار الدعج والتسبح عقب الملوحه والتراب, ايام لو انتادي بكت اهلها كانت الحريم شابات واليوم الي عجزت والي امانتها عند الواحد القهار, المهم ان ذلك صيف وعقبها ماتذكر صيف قعدتها لازم اسافر عشان نكسر هالصيف الصيف كان طويل وصعب بس فيه اشياء حلوه تخف الزحمه والفاكهه طحيحه والعزايم على ودنه والشباب فاضيين هذا اهو الصيف الي اذكره, وعقب ماتخرجنا من الجامعه ياله من فضللك بدا الكرف كان المسؤولين الرجال يعطونا جدول الصيف مبجر ومحد يطلع الا على هالجدول الاوليين صعبيين ماتقدر تغير الجدوول وفعلا ان قمت اداوم بالصيف واخذ اجازات بالشتا اخولف, بالصيف نومة الظهر تصير متعه وتقووم وللحين المغرب مابيين انا كنت اخش كتب اشتريها بالصيف واقراها بالشتا والحين عرفت ليش فيروز تقوول حبيتك بالصيف مادري ليش ؟ بس اكيد بلبنان الصيف مساكين كان عندهم موسم السياحه والحب والحين صار موسم الحرب واحنا صار موسم التوتر وحل مجلس الامه وللحين اذكر حل 1986 كان صيف وحل 96 وحل 2003 وحل 2006وهذا والغريبه ان صيفنا هالسنه بدايته غبار ومطروغيووم وان اظن بوعجره ابونا العوود العجيري هالسنه قال اكو غبار ورطوبه وحروانا اقوول دايما خنطالع الامور من الناحيه الحلوه خنقوول صيفنا خفيف والله يبارك ويدخل الجنه الي اخترع التكييف والبراده والمبردات بدون حساب, المهم وانا اهلوس بهالصيفيه تذكرت صديق يقوول ابوه كان يقوولان الي يتجاوز صيفيه صجيه بالكويت لازم يعطونه جنسية شرايكم ؟ بالختام اقوول
ياصيف يابو الليالي الطويله
اشكيك
على الي سافروتركني بحيره
وابكيك
لما الشتا يعزم باللفه والشيله
وافقدك
لحارت عيون الكحيله
واناديك
ياصيف لاتطوول ترى حموولك ثجيله

هل نحن اصبحنا تاريخ

اليوم صديق قالي موضوع ضحكني وفي نفس الوقت خلاني افكر هل اصبحنا تاريخ او جزء من التاريخ صاحبي رضي الله عنه,اخيرا وصلت يقوول نا خطوط هواتف جنوب السره ويقوول انه تعجب من فرحة عياله بالخط والسبب انه كان يعتقد ان الخطوط الارضيه من الماضي الحين الموبايلات تقووم باللازم, وهو يققولي هالسالفه تذكرت شلوون الدنيا ركضت وصار كل شي عادي اتذكر لما تلفزيون الكويت تحوول من العادي الى المللون وشلوون كان شي عجيب اتذكر شلوون كان بالبيت خط واحد وتلفوون واحد وسياره وحده واتذكر شلوون انبهرنا الفيديو والستلايت وبعدين شللون دخلنا دنيا النت , صرنا تاريخ شفنا وايد زعماء ماتوا وعشنا تحوول الطرب من الاغاني الطويله الى الهشك بشك وشفنا موضة الهيبز والجاكسن والغتر على الجتووف وعشنا متع السيارات الي تشووفها بافلام الثمانينات وتعتبرها متاحف شفنا وشفنا ومازلنا نشووف, بس الفرح الي عشناه بكل شي جديد
ماعاد موجود لان كل شي صار جديد, ولذلك صرنا تاريخ كل سوالفنا عن الماضي المو بعيد حتى البرد الي نتفنا هالسنه نتذكر متى يانا برد مثله , انا عن نفسي شخص متجدد بس والله لما تذكرت شريط احداث حياتي لقيت انها تاريخ مو شويه بس اخ من يدون ومن يقرء ومن يتعض ويقولوون ان للساعة عقارب حطوا بالكم لاتلدغكم بالله عليكم الي شاف نزول القمر وبيليه وجاسم يعقوب وتابع افلام سعاد حسني وحسن يوسف قبل مايتووب, ليته ماتب وسهير رمزي قبل ماتتعزل وشاف الدكتور الخطيب الله يطوول بعمره والنيباري والمرحووم سامي المنيس وراح حفلات النادي البحري الكويتي ونادي الصيد والفروسيه وحضر افتتاح منتزه الخيران وصافح ابونا جابر وشرب المزعفر والمهيل الاصلي الي يبط الراس وشاف الخدامات لما كانو مصريات يحكموون البيووت ودش الجامعه وشاف الكره الارضية الاصلية اليس كل هذا تاريخ, ازيد لا اكتفي وراح ازيد بس اسمع واقرا التعليقات بس والله ماني عوود بس اقوول الصج تاريخ

2006 ختامها

من زمان ماكتبت , وكل مافكر بموضوع اقوول ابي موضوع مو تقليدي والي يدش بلووقي يقرا شي خفيف وذي معنى وانا على الصعيد ( مو صعيد مصر( الصعيد الشخصي اسافر وايد سفرات قصيره بسبب العمل واشياء اخرى, تصدقوون بالفترات الاخيره قمت لما اسافر اخاف من الطياره رغم اني كنت حديد وشكثر كنت احب السفر ورحت دول وايد بل اكاد اقوول اني سافرت مره اكثر من 16 ساعة للوصول الى كراكاس وماكنت احس بشي بل على العكس كنت شديد اللهفه زين شنهو الي صار اخر مره اختضت الطياره شوي الله وكيللك القلب مثل ميقوول خالد الفيصل كما فزعة الطير , تعتقدوون ماذا حدث وهل هو تطور طبيعي او الكبر شين انا اعتقد احنا من كثر ماقمنا نسمع ونشووف ضعفت قلوبنا او قمنا نحب الحياة اكثر المهم لا احد يفكر وايد انا قمت لما اسافر اتسمع الاغاني واخر سفره سمعت اغنية قديمه اسمها غاب بدري انا يامن يجيبه وكانت عجيبه حق مطرب عرفت فيما بعد انه شي بدر ومن اهل الطرب الاوليين الي مالهم حظ لافلوس ولا شهره ولا معجبات يعني فن بس ماتسوى عليك والحين واحد مايسوى تبن فلووس ومعجبات وشهرة واخرتها مال مخدرات , شفتو الخوف من الطيارة شسوى

ضرس العقل

اسمع بضرس العقل وبصراحة كلما اسمع احد يقول ضرس العقل اتذكر الممثل المحبوب عبدالرحمن العقل ولاحد يسئل ليش , المهم انا حسيت بان اكو شيمو طبيعي باللثه خلف الاسنان ورحت للطبيب وبعدين قالي بعد شوية اسئله صور الاشعه , وانا للحين رايح على انه التهاب بسيط المهم رحت صورت الاشعه وكل ساع مال الاشعه يطالعني ويطالع الاشعه, وانا على الله , المهم رجعت للدكتور جان يورني صفت الضروس ولا اكو ضرسين بالاشعه تحت اللحم مو بالطول بالعرض ولما تخيلتهم الصراحه ضاق خلقي المهم الدكتور قالي معلومات خطيره قالي هذيله الضروس مثل البركان تنام بس لما تتحرك توجع وانت واحد فيهم تحرك ولازم نشيله وطبعا كالعاده انا راهي قال لي روح وتعال باجر وخلكك صايم ولما ييت بنجني وظل يحفر ويسووي عمال يشتغلون ولما خلص عطاني اسبوع راحه طبعا البنج مافج وقلت بقلبي ابوع وناسه كل يوم بشيل العقل اقصد ضرس العقل, تدروون شصار صار لي اسبوعين ماني قادر اكل صوب الضرس والويه متفخ, يقولون الي يشيل ضرس العقل وصل مرحلة العقل او العكس . الحين البركان الايمن تحرك وخلصنا منه بقى البركان الايسر الطبيب قال لي لاتحرش فيه ويمكن مايتحرك فخله, وانا قمت احاتي من اي التهاب بصراحه عوار الضرس شي كبير وشلوون لما يكوون العقل,انا يمكن موضوع الضرس وايد شغلني بس انصحكم باستخدام سيغنل والمحافظه على اسنانكم, فلن تعرف العقل حتى يشلعه طبيب الاسنان ولايعرف الشووق الا من يكابده ولاالصبابة الا من يعانيها

التطير

التطيير هي عادة عند العرب المقصود فيها هي ان يعتقد الانسان ويتفأل او يتشأم بشيئ وهذيالعاده او الصفه نشوفها عند ناس يمكن تحدد حياتهم انا مثلا اعرف ناس وايدين يعتقدون بالحظ ويقروون الابراج, اكو ناس اذا شفتهم من الصبح يومك ينعفس واكو العكس,انا هم مثلاالصبح وبالخط السريع احاول ارسم خط سيري وانيشن على سياره بالخط الي يمي مثلا مرسيدس خضرا او تويوتا عنابي واشوف على الخط يمشي ولا لا اذا انا سبقتها وايد اليوم اموري طيبه واذا السياره سبقتني وساعات ماشوفها اعرف ان اليوم اكو امور وايد ماراح تمشي ,اكو ناس تتفأل باول اغنيه يسمعها, واحد من الربع يقول كنت موصل زوجتي مستشفى الولاده ودخلتها عشان الصبح يولدونها وهذيك اليله مانام ويقول شغلت الراديو واول اغنيه وداعيه ياخر ليله تجمعنا حق عبدالكريم يقول واطيح له بجي تدرون شصار له بنته الحين عمرها عشر سنين,احلى شي انا اكو واحد معوق معا بالدوام معاه شلل اطفال بس انسان مكافح يداوم ومتزوج وسكبه طوع الاعاقه , كل ما اشوفه خاصه الصبح يومي يصير شحلوه وهات ياضحك وغشمرة تدرون ليش ؟ لاني عقب ماطيحت الميانه معاه طلبته طلب! يكسر عظام مسوؤلنه بالعصي الي عنده وكل ماصبح علي قلت له ماحان وقت الصفر